বিঝু

বিঝু তুই এবার অ'লে আমা হিল চাদিগাঙত

মাদি রোগোনি অই যায়,

আমা জুম্ম মা' বোনুন'র ইজ্জত ন'থায়।

বিঝু তুই এবার অ'লে জুম্মউনোর ঘর পুড়ি যায়

জুম্মউনোর উধোত মুয়োদ পানি নেই অয়।

বিঝু তুই এবার অ'লে আমার পরান ইত্তুক অই উদে

হুন্দি হন' সেটেলার বাঙাল এত্তননি,

বিঝু তুই এলে শুনি পেই

হিল চাদিগাঙর হানানি।

বিঝু এজে বিঝু যায়

পুরোনো ধগে আর ন'এজে,

নুঅ ধগে এঝে বিঝু

চিত্ আর ন'ভিজে।

পুরোনো দিনোত বিঝু এলে

জুম্মউনে আঝিহুঝিয়ে থান,

ইক্কো দিনোত বিঝু এলে

জুম্মউনে চিদেয় চিদেয় মুরি যান।

ন'য়েজ আর বিঝু তুই

এক বুগ চিদেবানি,

তুই এবে আমা ইদু

আহজি, হুজি চিদে নেয় গরি।

যেক্কে আমি বেগে মিলি

এক যধা অবং,

বেক্কুনে মিলিনেই আমি

জাদর মান রাগেবং।

সেক্কে এবে বিঝু তুই আমা ইদু

গীদে রেঙে গরি।

বিঝু তুই অবে আমার

জুম্ম জাদর নিজেনি,

তুই অবে আমা জাদর

এগত্তর গোরোনি।

-----------------

নিরন চাকমা

৮.০৪.২০১৪