বিঝু এজে
ফাগুনো আভা লগে
ভাদজরা ফুল ফুদন
মনান ধ' হুজি অবার হধা
হালিক আমা মনানি হুজি অই ন'উধে
চিদেয় চিদেয় বুগ ভোরি যায়
দুগর সাগরদ ভাজি যায়
হিল চাদিগাঙর মাদি।
বিঝু এজে
নাকশা ফুলর তুমবাজ নিঘিলে
বিঝু পেগ্, হোগিল দগরন
হালিক আমি তুমবাজ'র বদলে
মা-বোন'র পজা বাজ পেই
হোগিলর র' ন শুনি
শুনি পেই মা-বোন'র হানানি
বিঝু এজে
নুঅ গোরি গাজ'দ পাদা ফুদে
য়েল অই উধন মোন মুড়ো
হালিক আমা মনত দুগ বাড়ি যায়
যেক্কে আমা জাদর আল্যাক আঝি যাদে দেঘি।
বিঝু এজে
গেংখুলি গীদ, হেংগরঙ'অ র' আর ন' শুনে
হালিক আমি শুনি পেই
নানা বাবত্যা গানর বিশ্রী হিজেক
বিঝু এজে
গরে এগত্তর অবার হুজুলি
হালিক আমি এগত্তর অই ন'পারি
সালেন এজ' বাপ-ভেই, মা-বোন লগ
গমেদালে বিঝু পালেই জাদর ইজ্জ্ত বাজেই
বিঝুবোর পইদ্যানে আমি এগত্তর অবার
চেই
বিঝুবোরে মুজুঙদ রাগেই বেগে মিলি আমি
জাদ বাজেবার লাড়েই গোরি যেই।
-------------------
নিরন চাকমা
১০.০৪.১৪
কোন মন্তব্য নেই:
একটি মন্তব্য পোস্ট করুন